Leikurinn fór fram aðfaranótt miðvikudags og endaði með markalausu jafntefli en atvikið sem sendi þá í leyfi átti sér stað á 35. mínútu.

Nicolas Otamendi gaf Raphinha olnbogaskot sem varð til þess að það þurfti að sauma fimm spor í hálfleik en Cunha ætlaði upphaflega að gefa Otamendi gult spjald. Niðurstaðan var hins vegar ekkert spjald og var Tite, þjálfari Brasilíu ósáttur með ákvörðunina.

„Það er ómögulegt að missa af þessu olnbogaskoti Otamendi á Raphinha. Er þetta það sem réði úrslitum? Ég veit það ekki. Þetta var frábær leikur en það vantaði þann þátt í leikinn að jafnt á að ganga yfir bæði lið," sagði Tite.

Cunha og Ostojich voru báðir sendir í leyfi eftir þennan leik en Cunha átti að vera í VAR-klefanum á úrslitaleik Copa Sudamericana um helgina.