Hollenski landsliðsmaðurinn Vincent Janssen er búinn að semja við Antwerp til fjögurra ára. Það kemur á óvart enda gerist það ekki á hverjum degi að hollenskur landsliðsmaður semur við miðlungsstórt félag í Belgíu.
En Antwerp ætlar sér stóra hluti á komandi árum og er verið að leggja gríðarlega mikið í félagið núna.
Eftir síðasta tímabil var Marc Overmars ráðinn yfirmaður fótboltamála hjá félaginu og Mark van Bommel var ráðinn stjóri liðsins, en þeir voru báðir í hollenska landsliðinu sem leikmenn og eru stór nöfn í fótboltaheiminum.
Paul Gheysens, eigandi Antwerp, er að leggja mikið í félagið núna og mun Janssen fá vel borgað í Belgíu.
Antwerp-menn eru ekki hættir því núna eru belgísku landsliðsmennirnir Toby Alderweireld og Dries Mertens orðaðir við félagið.
Antwerp ætlar sér á toppinn í belgískum fótbolta.
Athugasemdir