Stjarnan vann 4-0 sigur á ÍBV í Bestu-deild kvenna í dag. Leikurinn var sá síðasti fyrir langa pásu sem gerð er á deildinni vegna EM kvenna. Kristján var ánægður að fara í pásuna með góðan sigur á bakinu.
„Já það munar öllu, sérstaklega eftir slysið sem var hjá okkur í síðasta leik, þá var það alveg nauðsynlegt að vinna þennan og vera að spila á móti liðinu sem var í 3. sæti, hoppa yfir þær í töflunni og vera með góða stöðu þegar við förum inn í pásuna."
Lestu um leikinn: Stjarnan 4 - 0 ÍBV
„Við bjuggumst við þeim mjög aftarlega á vellinum eins og varð og vorum búnar að undirbúa okkur undir það. Það gekk svona brösulega í fyrri hálfleik, við náðum ekki að opna þær nógu vel. En þegar við fórum að brjóta leikinn aðeins upp og ég tala nú ekki um þetta mark sem hefur gríðarleg áhrif í fyrri hállfeik, þá gekk þetta mjög vel í seinni þegar við náðum að skerpa enn betur á því sem við ætluðum að gera í upphafi leiksins. Það sást held ég alveg um leið og seinni hálfleikur byrjaði að við spiluðum á ákveðinn hátt í gegnum þær og það gaf mörk," sagði Kristján.
Eins og fyrr sagði gekk Stjörnunni mun betur að opna ÍBV vörnina í seinni hálfleik, hvað var talað um í hálfleik?
„Það var að skerpa á því hvernig við ætluðum að spila, þegar við vorum komin út á kantinn að halda áfram að spila upp kantinn og vera með yfirtöluna á kantinum. Þær voru að spila 5-4-2 og við vorum búin að sjá að það voru svæði sem voru að myndast hjá þeim."
Viðtalið í heild má sjá í spilaranum hér fyrir ofan, þar talar Kristján meðal annars um EM pásuna sem framundan er.