Þetta var mjög kærkominn sigur fyrir íslenska karlalandsliðið. Þetta var fyrsti sigurinn í alvöru fótboltaleik síðan í október 2017. Þá vann Ísland 2-0 gegn Kosóvó á Laugardalsvelli. Eftirminnilegt var þegar flugeldar fóru á loft eftir leikinn, en Ísland hafði tryggt sig á Heimsmeistaramótið í Rússlandi með þessum sigri.

Ísland vann Indónesíu tvisvar í janúar 2018 en þeir leikir voru ekki á alþjóðlegum leikdögum.

Frá því Ísland vann Indónesíu í byrjun árs 2018 hafði liðið í heildina spilað 15 leiki, gert sex jafntefli og tapað níu, þegar sigurinn kom loksins í gær. Þrír af þessum leikjum voru á HM, fjórir í Þjóðadeildinni og hinir átta voru vináttulandsleikir.

Ísland vann 2-0 gegn Kosóvó 9. október 2017 og Andorra 2-0 í gær, þann 22. mars 2019. Á milli þessara sigra liðu 529 dagar. Vonandi verður biðin ekki eins löng eftir næsta sigri.

Sigurinn í gær var líka fyrsti sigur Erik Hamren og Freys Alexanderssonar.

Sjá einnig:
Hamren eftir sinn fyrsta sigur: Mjög, mjög ánægður

Þrjár breytingar
Það er athyglisvert líka að skoða byrjunarliðið í leiknum gegn Kosóvó og byrjunarliðið í gær. Þrjár breytingar voru á byrjunarliðinu frá leiknum í gær og leiknum gegn Kosóvó.

Emil Hallfreðsson, Hörður Björgvin Magnússon og Jón Daði Böðvarsson byrjuðu gegn Kosóvó. Í gær var Hörður á bekknum en hinir tveir ekki í hópnum vegna meiðsla.

Í þeirra stað byrjuðu Alfreð Finnbogason, Ari Freyr Skúlason og hinn efnilegi Arnór Sigurðsson í Andorra í gær.

Næsti leikur er gegn Frakklandi á mánudag og er hann einnig í undankeppni EM. Frakkland er ríkjandi Heimsmeistari.