Lampard var látinn taka poka sinn í dag eftir slakt gengi á tímabilinu. Honum tókst að stýra Chelsea í eitt og hálft tímabil og var með 52,4 prósent sigurhlutfall.

Hann náði Meistaradeildarsæti á síðustu leiktíð en slök byrjun á þessu tímabili kostaði hann starfið.

„Þetta hafa verið gríðarlega mikil forréttindi og heiður að stýra Chelsea, félag sem hefur verið stór hluti af lífi mínu," sagði Lampard á Instagram.

„Ég vil þakka stuðningsmönnunum fyrir stuðninginn sem ég hef fengið á síðustu átján mánuðum. Ég vona að þeir viti það hversu þýðingarmikið það var fyrir mig."

„Þegar ég tók við starfinu þá skildi ég allar þær áskoranir sem voru framundan hjá félaginu á erfiðum kafla. Ég er stoltur af því sem við afrekuðum og þá er ég stoltur af ungu leikmönnunum sem komu upp úr unglingaliðinu og hafa stigið sín fyrstu skref með aðalliðinu. Þetta er framtíð félagsins."

„Á sama tíma er ég vonsvikinn með að hafa ekki fengið lengri tíma á þessu tímabili til að fara lengra með þetta félag. Ég vil samt sem áður þakka Roman Abramovich, stjórninni, leikmönnunum, þjálfaraliðinu og öllum hjá félaginu fyrir þeirra vinnu og þá sérstaklega á þessum tímum. Ég óska félaginu og liðinu góðs gengis í framtíðinni," sagði hann í lokin.