Manchester United er að ganga frá samningi við markvörðinn Tom Heaton fyrir næstu leiktíð.
John Cross á Mirror segir þetta og tekur ítalski fjölmiðlamaðurinn Fabrizio Romano undir það.
Heaton er 35 ára gamall og er að snúa aftur til félags sem hann þekkir vel. Hann var í akademíu Manchester United og var á mála hjá félaginu til 2010. Hann spilaði hins vegar ekkert með aðalliðinu áður en hann gekk í raðir Cardiff.
Hann samdi við Burnley 2013 þar sem hann var aðalmarkvörður. Hann hjálpaði félaginu tvisvar að komast upp í ensku úrvalsdeildina og vann sér inn sæti í enska landsliðshópnum eftir góða frammistöðu með Burnley. Hann á þrjá leiki að baki fyrir enska A-landsliðið.
Heaton gekk í raðir Aston Villa fyrir 8 milljónir punda sumarið 2019. Hann var aðalmarkvörður liðsins en meiddist illa á miðju tímabil. Fyrir þetta tímabil keypti Villa Emiliano Martinez frá Arsenal og var Martinez einn af betri markvörðum úrvalsdeildarinnar á þessari leiktíð.
Samningur Heaton er að renna út og mun hann þá ganga í raðir Man Utd. Sergio Romero og Lee Grant eru væntanlega á förum frá Man Utd og það er spurning hvað verður um David de Gea þar sem Dean Henderson verður líklega aðalmarkvörður United á næstu leiktíð.
Athugasemdir