Dóra María Lárusdóttir varð Íslandsmeistari í áttunda sinn er Valur vann Tindastól 6-1 í Pepsi Max-deild kvenna í kvöld. Þetta er átjánda tímabil hennar í efstu deild með Val en framtíðin er óákveðin.
Lestu um leikinn: Valur 6 - 1 Tindastóll
Valur varð Íslandsmeistari í tólfta sinn í sögu félagsins og hefur Dóra María átt stóran þátt í velgengni félagsins á þessari öld.
Hún hefur allan sinn feril á Íslandi spilað með Val og gat fagnað vel og innilega í kvöld. Hún framlengdi samning sinn við félagið í febrúar en sá samningur gildir út þetta tímabil.
„Rosalega vel. Það er notalegt að klára þetta þegar tvær umferðir eru eftir. Þetta er solid og flottur sigur þannig ég er mjög glöð," sagði Dóra við Fótbolta.net.
„Já, það má segja það. Þægilegt að skora snemma leiks og þær hafa örugglega ætlað að halda hreinu eins lengi og þær gátu og sátu svolítið neðarlega en við gengum á lagið og kláruðum þetta vel."
„Við vorum nokkuð sáttar með spilamennskuna í fyrri hálfleik og vorum að halda bolta ágætlega og skapa fína sénsa. Það var bara að halda áfram og vindurinn með í seinni hálfleik sem hjálpaði til og ekkert skemmtilegt fyrir þær að mæta í svona leik þegar þær vita hvað er undir hjá okkur."
„Þær eru með öflugt lið og ég vona að þær haldi sér í deildinni."
Blikaleikirnir voru efst í minninu í sumar en liðið fékk skell í byrjun tímabilsins en eftir það hefur liðið ekki tapað leik.
„Við fáum skell á móti Breiðablik og maður vissi ekki hvernig þetta myndi spilast eftir það en Blikarnir misstíga sig í kjölfarið. Við erum búnar að klára flesta okkar leiki og þetta er eina tapið okkar í sumar og svo safnast saman þessi stig. Blikaleikurinn úti gerði útslagið held ég."
„Við ætlum að sjálfsögðu að fara í þá leiki til að vinna."
Framhaldið er ekki ákveðið en hún hafði þó séð fyrir sér að hætta eftir þetta tímabil.
„Ég veit það ekki alveg. Mér líður vel í skrokknum og þetta er búið að vera gaman en farandi inn í þetta tímabil hafði ég séð þetta fyrir mér sem lokatímabil en sjáum bara til," sagði hún í lokin.
Athugasemdir