Það er útlit fyrir það að Lyon missi af franska meistaratitlinum í ár. Lyon mætti Paris Saint-Germain í hreinum úrslitaleik um titilinn í kvöld.
Þetta var hörkuleikur eins og við var búist. Lyon átti fleiri marktilraunir í leiknum en tókst ekki að setja eina þeirra í markið.
Lokaniðurstaðan var markalaust jafntefli sem eru alls ekki góð úrslit fyrir Lyon.
PSG er með eins stigs forystu á Lyon fyrir lokaumferðina. Lyon mætir Fleury 91, sem er í níunda sæti, í lokaumferðinni og PSG fær Dijon, sem er í áttunda sæti, í heimsókn.
Sara Björk Gunnarsdóttir er á mála hjá Lyon. Hún spilaði 12 leiki og skoraði þrjú mörk í frönsku úrvalsdeildinni á tímabilinu en hún er ófrísk og spilar ekki meira á tímabilinu.
Lyon hefur unnið 14 deildartitla en PSG hefur aldrei unnið titilinnn. Það gæti breyst um næstu helgi.
Athugasemdir