Ísland er í næst neðsta sæti riðilsins, þremur stigum fyrir ofan Liechtenstein. Í mars á þessu ári tapaði Ísland 2-0 á útivelli gegn Armeníu og vann svo 4-1 sigur í Liechtenstein.

Ýmislegt áhugavert
Stjórn KSÍ ákvað í síðasta landsleikjaglugga að taka Kolbein Sigþórsson úr hópnum sem Arnar Þór Viðarsson hafði valið, í kjölfar þess að fjölmiðlaumfjöllun fór af stað um að hann hafi beitt konu kyn­ferðis­legu of­beldi á skemmti­stað í Reykja­vík árið 2017. Kolbeinn er nýbúinn í aðgerð og er ekki leikfær fyrir komandi leiki.

Hörður Björgvin Magnússon, Sverrir Ingi Ingason og Alfreð Finnbogason eru enn á meiðslalistanum og mál Gylfa Þórs Sigurðssonar enn til rannsóknar. Aron Einar Gunnarsson gæti verið valinn á ný en hann var ekki í síðasta hóp eftir að hafa smitast af Covid-19 fyrir verkefnið. Hann hefur hinsvegar náð sér og spilað með Al Arabi í Katar undanfarnar vikur.

Rúnar Már Sigurjónsson dró sig úr hópnum síðast vegna meiðsla og persónulegra ástæðna samkvæmt frétt á heimasíðu KSÍ og fróðlegt að sjá hvort hann snúi aftur.

Hannes Þór Halldórsson hefur lagt landsliðshanskana á hilluna svo ljóst er að nýr markvörður kemur inn í hópinn frá því síðast. Ólíklegt er að Kári Árnason verði í hópnum en hann er að klára sinn feril og framundan er undanúrslitaleikur í bikar með Víkingi.