„Við fórum vel af stað í báðum hálfleikjum en síðan bara fjaraði þetta út. Fylkisstelpurnar voru bara sterkari og betri og áttu þetta bara skilið í dag. “ Voru fyrstu orð Gunnars Magnúsar Jónssonar þjálfara Keflavíkur eftir 5-1 tap Keflavíkur gegn Fylki í 16.liða úrslitum Mjólkurbikarsins í Árbæ í kvöld.
Lestu um leikinn: Fylkir 5 - 1 Keflavík
Eftir að hafa lent undir í blálok fyrri hálfleiks kom lið Keflavíkur ákveðið til leiks í þeim síðari og uppskar jöfnunarmark eftir um 55 mínútna leik. Adam var þó ekki lengi í paradís og 5 mínútum síðar hafði Fylkir endurheimt forystuna. Við það virtist öll trú á verkefnið fara úr Keflavíkurliðinu sem þurfti að horfa á eftir boltanum í netið aftur aðeins þremur mínútum síðar.
„Bæði annað og þriðja markið eru mjög ódýr. Að koma ekki boltanum bara í burtu það var ekki flóknara en það að taka eina Kjartan Másson hreinsun. En svo hentum við bara liðinu fram eins og maður gerir í bikar. Það er annað hvort að hrökkva eða stökkva.“
Keflavík er þar með úr leik í Mjólkurbikarnum þetta árið og getur sett alla sína orku í að sækja sinn fyrsta sigur í Pepsi Max deildinni. Gunnar svaraði og komst ekki hjá því að brosa.
„Já það er bara þessi gamli góði frasi. Þessi bikar það er gott að vera laus við hann, fínt að segja það núna á það ekki vel við? En það er búinn að vera stígandi hjá okkur í deildinni og við fáum verðugt verkefni á móti funheitum Blikum á Kópavogsvelli. Það verður challenge en við mætum þar og alvöru íþróttafólk það reynir að kvitta fyrir svona úrslit.“
Sagði Gunnar en allt viðtalið má sjá hér að ofan.
Athugasemdir
