Lestu um leikinn: KR 0 -  6 Valur

Valur er á toppi deildarinnar en KR á botninum. Matthías var eftir leik spurður að því hvað hefði verið lagt áherslu á í undirbúningi fyrir leikinn.

„Það er bara hugarfarið, að mæta klárar í leikinn og gamla klisjan - ekkert vanmat eða neitt svoleiðis. Við gerðum það vel," sagði Matthías.

Valur setti tóninn snemma og gerði út um leikinn fyrir hálfleik. „Það er kannski ástæðan fyrir því að það kom kafli þar sem við vorum slakari en við þurftum að vera, en það er svo sem ekkert mikið til að tala um."

Staðan var 3-0 fyrir Val í hálfleik en Matthías segir að það hafi ekki verið neitt mál að halda stelpunum við efnið í þeim síðari.

Valur er í þægilegri stöðu á toppnum og það segir mikið um styrk liðsins að landsliðskonan Elín Metta Jensen sé mikið að koma af bekknum.

„Liðsheildin hefur verið frábær í þessum verkefnum. Það er alltaf samkeppni um stöður. Þetta er liðið núna og ég veit ekki hvernig það verður á morgun. Hún (Elín Metta) kom frábær inn í dag og skoraði glæsilegt mark."

Allt viðtalið má sjá í spilaranum hér að ofan, en Valur er með sex stiga forskot þegar fjórar umferðir eru eftir af Bestu deildinni.