„Fyrri hálfleikurinn var góður og við sköpuðum okkur góð færi. Það voru að minnsta kosti þrjú færi sem við áttum að gera betur úr. Það var svo mjög fúlt að fá á sig mark úr eina fasta leikatriðinu sem að þær fengu. Við erum vanalega mjög sterkt lið í föstum leikatriðum. Seinni hálfleikurinn var ekki góður af okkar hálfu. Stjarnan var bara betri og þetta var verðskuldaður sigur hjá þeim,“ sagði Halldór Jón Sigurðsson, Donni, þjálfari Þórs/KA eftir tap gegn Stjörnunni í lokaumferð Pepsi-deildarinnar.
Lestu um leikinn: Stjarnan 2 - 0 Þór/KA
Leikmannahópur Þórs/KA var þunnskipaður í dag og munaði mikið um fjarveru mexíkósku leikmannanna þriggja sem voru kallaðar til æfinga með landsliði sínu og máttu ekki taka þátt í dag.
„Við vissum í þónokkurn tíma að þetta gæti mögulega gerst og vorum búin að vera að berjast við mexíkóska sambandið og FIFA,“ sagði Donni meðal annars og bætti við að Þór/KA hefði ekki mætt nokkrum vilja til að finna sameiginlega lausn á málinu. Þór/KA fer því án þessara lykilmanna í útileikinn erfiða gegn Wolfsburg í Meistaradeildinni í næstu viku.
„Það verður mjög erfitt en virkilega spennandi fyrir allar stelpurnar hérna.“
„Sama hvað gerist þá er ég stoltur af stelpunum. Þetta er búið að vera stórkostlegt tímabil heilt yfir. Stabíl tvö ár núna. Við vorum með 44 stig í fyrra og vorum bara þremur stigum frá því núna. Við skoruðum fleiri mörk núna og fengum á okkur færri en í fyrra. Mér fannst liðið vera að bæta sig heilt yfir þrátt fyrir að við yrðum ekki Íslandsmeistarar. Mér fannst Breiðablik bara gera sitt vel,“ sagði Donni og fór í kjölfarið yfir tímabilið hjá Þór/KA. Þar nefndi hann leiki gegn KR og Selfossi sem vissa vendipunkta í titilbaráttunni.“
Fréttir bárust af því um daginn að Donni hefði áhuga á starfi landsliðsþjálfara en hann var spurður út í starfið í Podcast þætti. Við spurðum Donna út í hans framtíð.
„Eins og ég sagði í þeirri útsendingu að flestallir metnaðarfullir þjálfarar hefðu klárlega áhuga á þeirri stöðu. Það var nú ekki beint nein yfirlýsing frá mér, það er nú kannski á misskilningi byggt en það er ekkert að frétta. Ég er þjálfari Þór/KA og er mjög stoltur af því. Ég á eitt ár eftir af mínum samning en hinsvegar sjáum við bara hvað gerist í framhaldinu. Samningurinn er uppsegjanlegur af beggja hálfu núna í tvær vikur og ég vænti þess bara að öllu óbreyttu að vera áfram þjálfari Þór/KA,“ sagði Donni meðal annars en hægt er að hlusta á allt viðtalið við hann í spilaranum hér að ofan.
Athugasemdir