Hin 17 ára gamla Amanda Andradóttir hefur verið valin í U19 landsliðshóp hjá Noregi.
Þetta er í fyrsta sinn sem Amanda er valin í norskan landsliðshóp.
Þetta er í fyrsta sinn sem Amanda er valin í norskan landsliðshóp.
Um er að ræða gríðarlega efnilegan miðjumann sem er uppalin hjá Víkingi og Val hér á landi. Hún fór ung að árum til Danmerkur þar sem hún var á mála hjá Fortuna Hjörring og Nordsjælland. Á síðasta ári gekk hún svo í raðir norska meistaraliðsins Vålerenga.
Hún hefur byrjað fyrstu tvo leiki Vålerenga í norsku úrvalsdeildinni á þessu tímabili og í dag lagði hún upp í 4-0 sigri á Lyn.
Ísland gæti verið að missa af þessum efnilega leikmanni sem sagðist í viðtali við Fótbolta.net vera mikið tengd báðum löndum. Hún á íslenskan föður og norska móður.
„Amanda Andradóttir er 17 ára búin að byrja báða deildarleikina Noregsmeisturum Vålerenga á tímabilinu, en er ekki valin í komandi verkefni A-Landsliðs Íslands eða æfingahóp U-19 ára landsliðsins. Norðmenn fljótir að pikka það upp og hafa valið hana í U19 hópinn sinn," skrifar Orri Rafn Sigurðarson, lýsandi á Viaplay í Danmörku, á Twitter en hann er vel tengdur í málefni Amöndu. Hann segir að Norðmenn hafi lagt mikið upp úr því að fá hana og líti á hana sem lykilmann í framtíðinni.
Hún getur valið að spila fyrir báðar þjóðir þangað til hún spilar keppnisleik með A-landsliði annað hvort Íslands eða Noregs. Eftir það getur hún ekki skipt á milli.
Amanda er dóttir Andra Sigþórssonar og frænka Kolbeins Sigþórssonar. Amanda hefur spilað fyrir yngri landslið Íslands - eins og áður segir - en það er mjög athyglisvert að hún sé farin að spila fyrir sterkasta lið Noregs svona ung.
Amanda Andradóttir er 17 ára búin að byrja báða deildarleikinn hjá 🇳🇴 meisturum Vålerenga á tímabilinu, en er ekki valin í komandi verkefni 🇮🇸 A-Landsliðsins, eða æfingarhóp U-19 ára liðsins. Norðmenn fljótir að pikka það upp og hafa valið hana í u19 hópinn sinn. #Fotboltinet
— Orri Rafn Sigurdarson (@OrriRafn) May 29, 2021
Athugasemdir