Ólafur Jóhannesson, þjálfari Vals, var fúll eftir 1-1 jafntefli gegn Fram í eina leik kvöldsins í Bestu deild karla.
Valur tók forystuna undir lok fyrri hálfleiks en gestirnir gerðu verðskuldað jöfnunarmark á lokamínútunum.
„Mér líður alltaf vel," sagði Óli Jó og var afar stuttur í svörum þegar hann var spurður hvernig honum liði að leikslokum. „Nei ég er ekki ánægður, við vorum ekki góðir í dag. Mér fannst við nánast ekki mæta til leiks."
Óla fannst jöfnunarmarkið vera verðskuldað og neitaði að nota vindinn sem afsökun fyrir slæmri spilamennsku sinna manna.
„Við þurfum bara að undirbúa okkur undir næsta leik sem er eftir viku og mæta klárir í hann. Markmiðið er bara að fara í næsta leik og fá góða frammistöðu frá leikmönnum. Við getum ekki verið að velta meiru fyrir okkur eins og staðan er núna," sagði Óli þegar hann var spurður út í markmið varðandi Evrópusæti.