Valur lék á als oddi gegn Þrótti R. þegar liðin mættust í Reykjavíkurmóti kvenna í dag. Leikurinn var í Egilshöll.

Málfríður Anna Eiríksdóttir skoraði fyrsta mark leiksins fyrir Íslandsmeistarana á sjöttu mínútu. Í kjölfarið skoraði Guðrún Karítas Sigurðardóttir tvö mörk.

Landsliðskonan Hlín Eiríksdóttir kom Val í 4-0 á 27. mínútu og leikurinn svo gott sem búinn. Guðrún Karítas fullkomnaði þrennu sína með fimmta marki Vals þegar tæpur hálftími var liðinn af leiknum.

Ída Marín Hermannsdóttir skoraði sitt fyrsta mark í leiknum á 32. mínútu áður en Þróttur minnkaði muninn. Guðný Árnadóttir, varnarmaður Vals, gerði þá sjálfsmark.

Í seinni hálfleiknum bætti Ída Marín við tveimur mörkum og fullkomnaði hún þrennu sína. Lokatölur 8-1 fyrir Val.

Valur er eftir þennan sigur í öðru sæti Reykjavíkurmóts kvenna með níu stig úr fjórum leikjum. Fylkir er á toppnum með fullt hús stiga. Þróttur er í fjórða sæti með þrjú stig, en sex lið taka þátt í mótinu.

Það er ein umferð eftir. Valur leikur við KR í síðasta leik sínum og Þróttur mætir Víkingi.