Það verða Þýskaland og Portúgal sem mætast í úrslitaleiknum á Evrópumóti U21 landsliða.

Þýskaland byrjaði frábærlega gegn Hollandi í kvöld og þeir komust yfir eftir rúmlega hálfa mínútu. Florian Wirtz, sem sló í gegn með Bayer Leverkusen í vetur, skoraði markið.

Wirtz skoraði svo aftur á áttundu mínútu og brekkan brött fyrir Hollendinga.

Staðan var 0-2 í hálfleik en um miðbik seinni hálfleik minnkaði varnarmaðurinn Perr Schuurs muninn fyrir Holland. Þýska stálið hélt út og landaði sigri.

Portúgal vann 0-1 sigur á Spáni fyrr í dag og það verða því Þýskaland og Portúgal sem mætast í sjálfum úrslitaleiknum.