Á myndinni eru Rúrik Gíslason, Eliza Reid og Hera Björk Þórhallsdóttir, velgjörðarsendiherrar SOS á Íslandi. Á myndirnar vantar fjórða sendiherra SOS, Vilborgu Örnu Gissurardóttur. Þá leit Guðni Th Jóhannesson forseti Íslands óvænt við eftir undirskrift.
Rúrik Gíslason landsliðsmaður í fótbolta er nýr velgjörðarsendiherra SOS Barnaþorpanna á Íslandi og skrifaði hann undir samning þess efnis í dag. Með því vill Rúrik leggja sitt af mörkum við að vekja athygli á starfi samtakanna sem útvega munaðarlausum og yfirgefnum börnum heimili og fjölskyldu.
Rúrik er þrítugur og á að baki 50 A-landsleiki í fótbolta fyrir Ísland. Hann slæst í hóp með fríðu föruneyti þriggja annarra velgjörðarsendiherra SOS Barnaþorpanna á Íslandi en fyrir í því teymi eru forsetafrúin Eliza Reid, söngkonan og fasteignasalinn Hera Björk Þórhallsdóttir og ævintýrakonan Vilborg Arna Gissurardóttir.
„Ég hlakka til að taka þátt í þessu frábæra starfi hjá SOS Barnaþorpunum og vekja athygli á samtökunum. Það er mér mikill heiður vera kominn í þetta samstarf," segir Rúrik.
„Rúrik hefur áður látið sig góðgerðarmálefni varða og eftir að við leituðum til hans sýndi hann mikinn og einlægan áhuga á samstarfi við okkur. Það er okkur mikið gleðiefni að Rúrik hafi þegið boð okkar um að gerast SOS sendiherra," segir Hans Steinar Bjarnason, upplýsingafulltrúi SOS Barnaþorpanna.
SOS Barnaþorpin eru barnahjálparsamtök sem reka 572 barnaþorp í 126 löndum. Í þeim eru um 90 þúsund börn sem fá öllum sínum grunnþörfum mætt og standa samtökin einnig fyrir fjölda annarra verkefna sem hjálpa sárafátækum barnafjölskyldum í nágrenni barnaþorpanna.
Rúrik Gíslason, Eliza Reid og Hera Björk Þórhallsdóttir, velgjörðarsendiherrar SOS á Íslandi. Á myndirnar vantar fjórða sendiherra SOS, Vilborgu Örnu Gissurardóttur.
Athugasemdir
