„Á síðasta ári skoraði ég 36 mörk og var markahæstur. Sá markahæsti á þessu tímabili hefur skorað 18 mörk svo það er hægt að horfa á það með tvennum hætti hvort þetta hefur verið gott tímabil eða ekki hjá mér," segir Haaland.

„Ég tel að við séum að gera ansi vel sem lið og það er auðvitað mikilvægast. Ég hef klúðrað færum, fullt af færum. Ég mun væntanlega klúðra fleiri dauðafærum í framtíðinni. Fólk mun gagnrýna mig, ætti ég að vera að hugsa um það? Nei."

„Ég get bætt mig á ýmsum sviðum, fólk segir að ég sé góður í að skora mörk en ég klúðraði mesta dauðafæri sögunnar fyrir tveimur dögum svo ég get bætt mig í því."

Haaland ræddi við fjölmiðlamenn á fréttamannafundi í dag en annað kvöld leikur City gegn FC Kaupmannahöfn í seinni viðureign liðanna í 16-liða úrslitum Meistaradeildarinnar. City vann 3-1 útisigur í fyrri leiknum í Kaupmannahöfn.

Á fréttamannafundinum var Haaland spurður út í sína framtíð en hann hefur verið orðaður við Real Madrid.

„Ég er afskaplega ánægður hér, sérstaklega með þetta fólk í kringum mig. Ég er ánægður með stjórann og stjórnina. Ég er virkilega ánægður. Maður veit aldrei hvað framtíðin ber í skauti sér en ég er mjög glaður."