Veislan hefst strax í hádeginu þegar Liverpool heimsækir West Ham United og er gríðarlega mikið undir í þeim slag, þar sem lærisveinar Jürgen Klopp þurfa nauðsynlega á sigri að halda eftir tvo tapleiki í röð.

Þeir eru svo gott sem búnir að missa af titilbaráttunni og þurfa núna að vinna alla leikina sem eftir eru og treysta á að Manchester City og Arsenal misstigi sig.

Manchester United tekur svo á móti Jóhanni Berg Guðmundssyni og félögum frá Burnley og getur bætt stöðu sína í evrópubaráttunni með sigri. Rauðu djöflarnir eru þó enn heilum sjö stigum frá Tottenham í evrópudeildarsæti.

Burnley þarf þó líka sigur í fallbaráttunni og því er hægt að búast við spennandi slag á Old Trafford, alveg eins og á St. James' Park þar sem Newcastle getur fellt Sheffield United með sigri. Newcastle er í evrópubaráttunni ásamt Man Utd en Sheffield er í botnsæti deildarinnar og þarf sigur til að halda óraunhæfum vonum sínum um að hanga í úrvalsdeildinni á lífi.

Það eru aðrir áhugaverðir slagir sem eiga sér stað í fallbaráttunni áður en Aston Villa og Chelsea eigast við í lokaleik dagsins. Þar er um afar spennandi slag að ræða þar sem bæði lið þurfa á sigri að halda.

Leikir dagsins:
11:30 West Ham - Liverpool
14:00 Man Utd - Burnley
14:00 Newcastle - Sheffield Utd
14:00 Wolves - Luton
14:00 Fulham - Crystal Palace
16:30 Everton - Brentford
19:00 Aston Villa - Chelsea