Þór og Fjölnir áttust við í eina leik dagsins í A-deild Lengjubikarsins þar sem heimamenn tóku forystuna eftir hálftíma í Boganum.

Fannar Daði Malmquist Gíslason skoraði þá en skömmu síðar fékk Ragnar Óli Ragnarsson beint rautt spjald og skildi Þórsara því eftir leikmanni færri.

Það leið ekki á löngu þar til það jafnaðist í liðum þegar Vilhjálmur Yngvi Hjálmarsson fékk að líta seinna gula spjaldið sitt á 42. mínútu. Staðan var því 1-0 í leikhlé og aðeins 20 leikmenn eftir inni á vellinum.

Bæði lið gerðu tvöfalda skiptingu í hálfleik en Þórsarar héldu forystunni allt þar til á 71. mínútu, þegar Baldvin Þór Berndsen náði að gera jöfnunarmark fyrir gestina úr Grafarvogi.

Hvorugu liði tókst að bæta marki við leikinn og urðu lokatölur 1-1, en þetta er fyrsti leikurinn sem Þór mistekst að sigra í Lengjubikarnum í ár.

Akureyringar ljúka keppni á toppi síns riðils og fara því í undanúrslit, með 13 stig úr 5 leikjum. Fjölnir endar í þriðja sæti riðilsins með 8 stig.