Ortega, sem er 31 árs gamall, var keyptur til Man City frá Arminia Bielefeld í Þýskalandi sumarið 2022. Hann hefur síðan þá spilað 24 leiki fyrir City og gert það afar vel.

„Manchester City er bara með eitt vandamál varðandi Stefan Ortega: Hann er of góður til að vera varamarkvörður," segir í grein The Athletic um leikmanninn.

City ætti ekki að hræðast meiðsli Ederson þar sem Ortega er til staðar og liðið er á meðan í öruggum höndum. Í fréttinni kemur fram að Pep Guardiola. stjóri City, hafi verið það ánægður með Ortega þegar hann spilaði á síðasta tímabili að hann hugsaði um að nota hann sem aðalmarkvörð á þessari leiktíð. En Ederson stóð sig vel undir lok tímabili og hélt sæti sínu.

Framtíð Ortega er í óvissu þar sem hann hefur ekki samþykkt að gera nýjan samning við City þrátt fyrir ítrekaðar tilraunir. Hann er nægilega góður til að vera aðalmarkvörður í mörgum liðum en fær núna tækifæri til að sýna sig með City. Það verður gaman að sjá hvernig þessi öflugi markvörður mun standa sig.