Valur tók á móti Grindavík á Hlíðarenda í kvöld. Valsmenn byrjuðu leikinn mun betur og voru ekki lengi að koma sér í álitleg marktækifæri. Patrick Pedersen var funheitur í dag og kom sínum mönnum yfir strax á 16. mínútu eftir frábært samspil.

Það lifnaði yfir Grindavík eftir því sem leið á fyrri hálfleikinn með Sito fremstan í fararbroddi en Anton var vakandi í marki Vals. Á 34. mínútu skoraði Pedersen síðan sitt annað mark og Grindvíkingar í vondum málum.

Síðari hálfleikur var nokkuð jafn og áttu bæði lið sín færi. Rothöggið kom hinsvegar á 66. mínútu þegar Pedersen henti í þriðja mark sitt í dag, A+ frammistaða hjá honum í dag.

Eftir markið róaðist leikurinn og Valsmenn gerðu skiptingar enda að mæta Sheriff á fimmtudaginn. Á lokamínútum leiksins fékk Valur víti. Tobias Thomsen steig á punktinn en misnotaði vítið. Kristinn Ingi var hinsvegar fyrstur að bregðast við og kláraði dæmið.

4-0 lokatölur og stórlið Vals því komið með 32 stig í öðru sæti deildarinnar. Grindavík er í nokkuð rólegum málum í 6. sæti deildarinnar með 23 stig.