Lögreglan í Manchester handtók í gær tíu manns í tengslum við mótmælin sem áttu sér stað fyrir leik Manchester United og Liverpool í maí síðastliðnum.
Stuðningsmenn United héldu mótmæli fyrir utan Old Trafford til að mótmæla eigendum félagsins.
Miklar óeirðir brutust út og náðu stuðningsmenn að brjóta sér leið inn á Old Trafford og á grasið.
Leiknum var frestað en hópur stuðningsmanna köstuðu blysum og öðrum hlutum og frömdu skemmdarverk á bæði leikvangnum og hóteli í grennd við völlinn.
Átta manns voru handteknir í kringum mótmælin og hafa nú tíu manns verið handteknir til viðbótar en allt voru það karlmenn á aldrinum 20 til 51 árs.
Allir mennirnir sitja nú í gæsluvarðhaldi og verða yfirheyrðir í dag eða á morgun. Lögreglan hefur þá birt myndir af 36 einstaklingum sem þeir vilja ná tali af.
Athugasemdir
