Þessi tíðindi koma kannski ekki mikið á óvart þegar litið er til leikmannakaupa Forest undanfarin ár en félagið hefur keypt hvern leikmanninn á fætur öðrum eftir að liðið komst upp í deildina.

Fram kemur á The Athletic í dag að lögmenn ensku úrvalsdeildarinnar hafi krafist þess að átta stig yrðu tekin af Forest fyrir brot félagsins.

Þetta hefði getað farið verr en samt segist Forest „verulega vonsvikið" með niðurstöðuna. Forest fékk hrós fyrir það að vinna vel með dómstólnum.

Skýrslan í máli Forest innihélt 25,000 orð og var 50 blaðsíður á lengd en þar kemur meðal annars fram að félagið hafi farið gegn ráðum síns eigins fjármálastjóra, Thomas Bonser. Hann varaði félagið við því að það væri í hættu á að brjóta reglur en það stoppaði Forest ekki í því að kaupa leikmenn. Brotin urðu stærri en Bonser hafði gert ráð fyrir.

Nottingham Forest telur að núverandi fjárhagsreglur (e. profit and sustainability rules) séu að hindra félög eins og Forest í að komast hærra og lengra, og þær leiði til stöðnunar. Þær eigi að hjálpa félögum en séu ekki að veita mikið svigrúm.

Eins og áður segir þá hefur Forest íhugað að áfrýja niðurstöðunni en á sama tíma þá slapp félagið nokkuð vel og er talað um það í grein The Athletic að lögmenn Forest hafi unnið þrekvirki við að halda stigafrádrættinum í fjórum stigum. Ef Forest áfrýjar þá gæti félagið hugsanlega fengið stærri refsingu.

Forest er einu stigi frá Luton og öruggu sæti þegar níu leikir eru eftir.