Tristan, sem er 24 ára gamall, sleit fyrst krossband í júlí 2021, sneri til baka og kom við sögu í þremur leikjum 2022 en lenti svo í því að slíta aftur krossband og var frá allt tímabilið 2023.

Núna er það ljóst að hann mun ekkert spila í ár en þetta eru afar leiðinleg tíðindi.

„Ég var í spili á æfingu og er í einhverri baráttu um boltann. Ég reyni einhvern veginn að stíga fyrir gæjann og finn þá einhverja skrýtna tilfinningu í hnénu," segir Tristan við Fótbolta.net í dag. „Það er alltaf mjög óþægilegt þegar maður fær einhverja vonda tilfinningu í hnéð en ég gerði ekki ráð fyrir að þetta væri slitið aftur. Ég varð alltaf betri á milli daga en vildi samt fá mynd af þessu til að vera viss um hvað gerðist."

„Ég vil komast í aðgerð sem fyrst til að byrja endurhæfinguna strax og er bara að bíða eftir að heyra meira frá læknum með næstu skref," segir hann jafnframt.

Fótbolti.net óskar honum góðs bata.