Brynjar Björn Gunnarsson var að vonum ánægður með sigur HK gegn ÍA í nýliðaslag Pepsi Max-deildarinnar fyrr í dag.
HK vann 0-2 á Akranesi og kom sér þar með úr botnsætinu. Skagamenn eru aftur á móti í þriðja sæti deildarinnar þrátt fyrir að hafa tapað þremur deildarleikjum í röð eftir daginn í dag.
„Það er alltaf erfitt að koma upp á Skaga. Við vissum að þetta yrði erfiður leikur en spiluðum góða vörn og nýttum færin okkar ágætlega," sagði Brynjar Björn.
„Ég man ekki eftir færi sem ÍA fékk. Ein og ein fyrirgjöf sem var barátta um í teignum en meira var það ekki."
Bjarni Gunnarsson kom aftur inn í HK-liðið eftir fjarveru og skoraði fyrsta mark leiksins. Brynjar var mjög ánægður með hans framlag sem og framlag Valgeirs Valgeirssonar, sem skoraði seinna markið. Sá drengur er fæddur 2002.
„Hann er búinn að standa sig vel. Hann byrjaði sem hægri bakvörður um daginn og búinn að koma inná í einum og einum leik. Hann fékk tækifæri í dag, meira í sinni stöðu, og skilaði því gríðarlega vel. Hann var vinnusamur, viljugur að hlaupa fram á við, og skoraði gott mark. Hann var klókur hérna í lokin og vann fullt af aukaspyrnum, gríðarlega góð frammistaða þar."
Athugasemdir