Viðburðurinn er haldinn af félögunum í Chess After Dark en hugmyndin að einvíginu kom eftir að þáttastjórnendur hlaðvarpsins héldu „Blush mótið“ haustið 2022 en þar mættust Heimir og Hörður í mótinu þar sem Heimir hafði sigur. Þeir félagar eru báðir afbragðsskákmenn og eru álíka sterkir svo einvígið ætti að vera mjög jafnt og spennandi.

Skákin milli þeirra félaga vakti mikla athygli og því var ákveðið að slá til einvígisins.

Tefldar verða tíu hraðskákir og má lofa mikilli skemmtun.

Samkvæmt áreiðanlegum heimildum eru báðir keppendur afar sigurvissir og tala um að sigur verði formsatriði.

Sigurvegari einvígisins mun ekki aðeins sigra Einvígi aldarinnar, heldur einnig stoltið sem mun fylgja því að sigra og síðast en ekki síst, komið því á hreint hvor þeirra er í raun og veru sterkari skákmaður.

Bæði er hægt að mæta á staðinn eða horfa heima í stofu en sýnt verður frá viðburðinum í beinni útsendingu á Vísi en þar munu sterkustu skákmenn landsins lýsa skákunum hjá þeim félögum.

Knattspyrnuáhugamenn eru hvattir til að láta þennan spennandi viðburð ekki framhjá sér fara.