„Við vissum að þetta yrði erfiður leikur á móti góðu liði. Þýskaland hefur sýnt það og sannað. Þeir hafa unnið 17 leiki í röð í undankeppni HM og við vissum að þetta yrði erfiður leikur," sagði Aron sem er klár í slaginn fyrir leikinn gegn Armenum á morgun. „Mér líður vel eftir leikinn. Endurheimtin hefur verið fín og ég er klár."

Aron var spurður út í breytingarnar sem Arnar Þór Viðarsson og Eiður Smári Guðjohnsen hafa komið með eftir að þeir tóku við landsliðinu.

„Breytingarnar eru ekki miklar. Það eru smá öðruvísi hreyfingar í færslum og ekki mikið sem við þurfum að breyta. Við höfum haft stuttan tíma til að fara yfir þetta. Mér fannst við venjast því hratt í leiknum gegn Þjóðverjunum. Við unnum okkur inn í leikinn. Þessar hreyfingar koma síðan sjálfkrafa hjá okkur," sagði Aron sem var einnig spurður út í sitt hlutverk. „Ég er vanur því að vera sitjandi miðjumaður sem þarf að stjórna í kringum mig. Þetta er ekki eitthvað sem ég er óvanur að gera."