Beppe Marotta, framkvæmdastjóri Inter, vonast til að fá bæði Paulo Dybala og Romelu Lukaku til félagsins í sumar.
Inter mistókst að verja Ítalíumeistaratitilinn eftir æsispennandi titilbaráttu við erkifjendurna og nágrannana í AC Milan. Titilbaráttan entist alveg til síðasta leikdags og eru Inter-menn staðráðnir í því að endurheimta titilinn á næstu leiktíð.
Argentínski framherjinn Dybala er falur á frjálsri sölu á meðan Inter er að reyna að fá afslátt á Lukaku, sem var seldur frá Inter til Chelsea fyrir einu ári síðan fyrir rúmlega 100 milljónir evra.
„Við vonum að Dybala muni spila með okkur á næstu leiktíð," sagði Marotta og bætti svo við: „Við erum ekki að flýta okkur, við þurfum að finna lausnir í sumar ef við viljum líka krækja í Lukaku."
Ivan Perisic er að ganga í raðir Tottenham. „Við virðum hans ákvörðun. Við reyndum að halda honum en hann vildi prófa úrvalsdeildina. Við óskum honum alls hins besta."
