Jökull Andrésson er þessa daganna á láni hjá Exeter City frá Reading. Markvörðurinn, sem er nítján ára gamall, gekk í raðir félagsins síðasta þriðjudag á neyðarláni í viku. Neyðarlán er það kallað þar sem það er utan félagaskiptaglugga. Meiðsli hrjá markverði liðsins og því fékk félagið undanþágu.

Jökull lék sinn fyrsta leik fyrir Exeter, og jafnframt sinn fyrsta leik í atvinnumannadeild, á þriðjudag. Hann lék sinn annan leik í gær þegar Exeter vann gegn Carlisle í ensku D-deildinni.

Matt Taylor, fyrrum leikmaður Portsmouth, West Ham og Burnley, er þjálfari Exeter og tjáði hann sig um Jökul eftir sigurleikinn í gær. Fyrsta spurning var út í mögulega framlengingu á veru Jökuls hjá félaginu.

„Jökull hefur gert þokkalega vel í þessum tveimur leikjum. Við munum skoða það og vonandi vill Reading að hann verði hér áfram og fái aukna reynslu. Hann er markvörður og spilaði sína fyrstu tvo leiki. Ég veit að hann er Íslendingur en vertu velkominn í enska fótboltann. Þetta er frábær reynsla fyrir hann," sagði Taylor í viðtali sem birtist á Twitter-reikningi félagsins og nefndi að aðstæður hefðu ekki verið fullkomnar fyrir markmenn.

Spyrillinn spurði Taylor nánar út í Jökul og nefndi að vel hefði heyrst í Jökli í markinu, eins og hann hefði verið lengi hjá félaginu.

„Hann er með persónuleika sem mér finnst mjög verðmætur, persónuleiki sem er nauðsynlegur í nokkrum stöðum á vellinum. Að hann búi yfir þessum persónuleika er eitthvað sem er honum, fjölskyldu hans og Reading til sóma. Við viljum að hann verði áfram og haldi áfram að gera vel þangað til markverðirnir snúa aftur, vonandi nær Jökull að halda dampi," sagði Taylor.

🧤 A well deserved clean sheet for @JokullAndresson and the whole back line who were exceptional!#ECFC #OneGrecianGoal pic.twitter.com/HJh2muN24n

— Exeter City FC (@OfficialECFC) October 31, 2020