Hann gerði sigurmarkið í sigri gegn Udinese í gær og er Milan á toppi deildarinnar með 16 stig eftir 6 umferðir.

„Ég sagði við ykkur fyrir sex mánuðum að ég væri bara að hita upp," sagði Zlatan í viðtali að leikslokum, en hann skoraði 10 mörk í 18 leikjum á seinni hluta síðasta tímabils.

„Hér er ég partur af ungu liði með stór markmið. Leikmenn hérna eru tilbúnir til að leggja mikla vinnu á sig og maður sér hvernig liðið verður betra með hverjum degi."

Zlatan er þó ekki alveg sú ofurhetja sem hann þykist oft vera og segist ekki vera neitt án liðsfélaganna sem eru duglegir að skapa færi fyrir hann.

„Ég gæti ekki gert svona vel ef ég væri ekki partur af svona öflugu liði. Ég verð að þakka liðsfélögunum og þjálfaranum fyrir allt."

Zlatan gekk í raðir Milan í janúar í fyrra og er búinn að gera 19 mörk í 27 leikjum í öllum keppnum frá komu sinni til félagsins.