Tímabilið hjá franska varnarmanninum Lucas Hernandez er lokið eftir að hann reif liðband í hné í 1-0 tapi Paris Saint-Germain gegn Borussia Dortmund í Meistaradeild Evrópu í gær.
Hernandez meiddist undir lok fyrri hálfleiks í leiknum í gær en Lucas Beraldo kom inn í hans stað.
PSG staðfesti síðan í dag að hann hefði rifið liðband í hné og verður hann því frá næstu sex til níu mánuði.
Tímabilinu er lokið hjá Hernandez og er ljóst að hann fer ekki með Frökkum á Evrópumótið í Þýskalandi í sumar.
Hernandez, sem kom til PSG frá Bayern München á síðasta ári, hefur spilað 37 leiki fyrir Frakka.
Athugasemdir
