Chelsea er komið upp í 8. sæti ensku úrvalsdeildarinnar eftir að hafa unnið Tottenham Hotspur, 2-0, á Stamford Bridge í kvöld.

Föstu leikatriðin héldu áfram að stríða Tottenham. Í síðasta leik fékk liði tvö mörk á sig eftir föst leikatriði og kom fyrra mark Chelsea einmitt eftir aukaspyrnu.

Conor Gallagher kom boltanum á fjær og þar var Trevoh Chalobah aleinn og mættur til að skalla boltanum yfir Guglielmo Vicario í markinu.

VAR tók sér dágóðan tíma að skoða mögulega rangstöðu í markinu og var það mikill léttir fyrir heimamenn þegar markið var dæmt gott og gilt, einhverjum tveimur mínútum síðar.

Tottenham fékk færi til að jafna undir lok hálfleiksins en Cristian Romero mistókst að stýra boltanum á markið eftir glæsilegan bolta frá Pedro Porro.

Gestirnir fóru í leit að jöfnunarmarki í síðari hálfleiknum. Þeir settu Chelsea undir ágætis pressu en fengu þungt högg þegar Nicolas Jackson tvöfaldaði forystuna um tuttugu mínútum fyrir leikslok.

Cole Palmer skaut aukaspyrnu sinni í þverslá og skoppaði boltinn fyrir Jackson sem skallaði honum inn. Jackson undanfarið verið í basli með að klára færin, en hann gerði það í þetta sinn og var það bara nokkuð vel gert.

Þessi sigur Chelsea var mikilvægur fyrir þá bláklæddu í baráttu þeirra um að komast í Evrópukeppni. Tottenham var á meðan að tapa þriðja leiknum í röð og getur svo gott sem kvatt farseðilinn í Meistaradeild Evrópu. Liðið er sjö stigum á eftir Aston Villa og á eftir að mæta bæði Liverpool og Manchester City.