„Mér líður fyrst og fremst vel með þessi þrjú stög og fjögur mörk. Frammistaðan var mjög kaflaskipt en ég er fyrst og fremst ánægður að hafa náð í þrjú stig á móti öflugu Keflavíkurliði.“ sagði Gunnar Magnús Jónsson, þjálfari Fylkis, eftir 4-2 sigur á Keflavík í Árbænum í kvöld.
Lestu um leikinn: Fylkir 4 - 2 Keflavík
Fylkir eru nýlliðar í deildinni en Gunnar segir að hann og allir sem koma að Fylkisliðinu séu himinlifandi með byrjunina á mótinu. Tvö jafntefli og fyrsti sigur mótsins í kvöld sem verður að teljast ansi gott fyrir nýliða.
„Ég og allir sem að liðinu standa getum ekki annað en verið virkilega ánægð með þessa byrjun á mótinu.“
Leikurinn í kvöld var stór fyrir Gunnar og fjölskyldu hans. En hann var ekki bara að mæta Keflavík, lið sem hann hefur þjálfað í mörg ár, heldur var hann einnig að mæta dóttur sinni sem leikur með Keflavík. Sigurbjörg Diljá byrjaði leikinn með Keflavík en Gunnar segir það hafa verið óþægilegt að taka þátt í þessum leik í ljósi aðstæðna.
„Ég skal alveg viðurkenna það að það var erfitt. Það að þurfa að fara í gegnum þetta, og líka fyrir hana.“
„Þetta var svolítið óþægileg tilfinning. Maður reyndi bara að gíra sig sjálfur upp í leikin og hún líka með sig og bara hugsa um sitt lið. Mér fannst hún gera það vel, hún stóð sig vel í leiknum. Þetta er reynsla sem fer í bankann. Þetta er erfitt fyrir mig en líka fyrir hana. 16 ára og að feta sín fyrstu spor í efstu deild. Það verður skemmtilegt að fyrlgjast með henni í framtíðinni,“ bætti Gunnar svo við, stoltur af dóttur sinni.
Fylkir eiga Tindastól á útivelli í næsta leik.
„Þetta er hörkulið á Króknum og alltaf erfitt að fara norður. Núna njótum við aðeins fram yfir helgi og síðan gírum við okkur í leikinn við Tindastól í næstu viku.“ sagði Gunnar Magnús Jónsson, þjálfari Fylkis, að lokum eftir 4-2 sigur gegn Keflavík í Árbænum í kvöld.
Viðtalið við Gunnar má sjá í heild sinni í spilaranum hér að ofan.
