| fim 02.maí 2024 10:15 Mynd: Fótbolti.net - Hulda Margrét |
|
Spá þjálfara í 2. deild: 3. sæti
Fótbolti.net kynnir liðin sem leika í 2. deild í sumar eitt af öðru eftir því hvar þeim er spáð. Við fengum alla þjálfara liðanna í deildinni til að spá fyrir sumarið og fengu liðin því stig frá 1-11 eftir því en ekki var hægt að spá fyrir sínu eigin liði. Í þriðja sæti í spánni eru Haukar.
Haukum er spáð þriðja sæti.
Ian Jeffs tók við Haukum í vetur.
Guðjón Pétur er mættur heim í Hauka.
Frosti Brynjólfsson er öflugur.
Daði Snær Ingason er mikilvægur liðinu.
Hvað gera Haukar í sumar?
1.
2.
3. Haukar, 96 stig
4. Víkingur Ó. 94 stig
5. Þróttur V., 92 stig
6. Ægir, 78 stig
7. Höttur/Huginn, 56 stig
8. KFG, 54 stig
9. Völsungur, 37 stig
10. Reynir S., 35 stig
11. KF, 27 stig
12. Kormákur/Hvöt, 13 stig
3. Haukar
Haukar hafa núna verið samfleytt í 2. deild frá 2020 og hafa síðustu ár verið vægast slök hjá þeim rauðklæddu úr Hafnarfirði. Liðið endaði í níunda sæti bæði 2021 og 2022, en í fyrra var niðurstaðan sjöunda sæti. Að vera í neðri hlutanum í 2. deild á ekki að vera boðlegt fyrir Hauka, en núna virðist horfa til bjartari tíma. Það er að rísa tignarlegt fótboltahús á Ásvöllum og með því kemur jákvæður blær. Nýtt þjálfarateymi er tekið við stjórnartaumunum og gömul stjarna er mætt heim. Það kemur örugglega ekkert annað til greina en að fara upp núna og vera allavega í Lengjudeildinni þegar fótboltahúsið verður tekið í notkun. Ef spáin rætist þá enda Haukar hins vegar í þriðja sæti, en það munaði alveg ótrúlega litlu á liðunum í öðru til fimmta sæti í þessari spá.
Þjálfarinn: Ian Jeffs tók við þjálfun Hauka í vetur og með honum til aðstoðar eru Dusan Ivkovic og Stefán Logi Magnússon. Þeir tóku við liðinu af Atla Sveini Þórarinssyni sem hafði stýrt Haukum í tvö ár. Jeffs tók við liði Þróttar haustið 2021 og kom liðinu síðan upp í Lengjudeildina ári síðar. Hann hætti með Þrótt eftir að hafa haldið liðinu upp í Lengjudeildinni í fyrra. Áður þjálfaði hann bæði meistaraflokk karla- og kvenna hjá ÍBV ásamt því að vera aðstoðarþjálfari íslenska kvennalandsliðsins.
Sjá einnig:
Ian Jeffs: Það félag sem sýndi alvöru áhuga á að fá mig í starf
Stóra spurningin: Rífa Haukar sig í gang?
Síðustu ár á Ásvöllum hafa í raun verið eintóm vonbrigði. Úrslitin hafa ekki verið góð og áhuginn á liðinu ekki mikill. Núna eru breytingar innan sem utan vallar, en það er spurning hvort úrslitin fylgja með. Stóra spurnigin fyrir sumarið er einfaldlega hvort Haukar nái að rífa sig í gang og koma sér í einhverja baráttu um að fara upp?
Lykilmenn
Guðjón Pétur Lýðsson: Það voru stórar fréttir rétt fyrir mót þegar Guðjón Pétur ákvað að semja við Hauka, félagið sem hann hjálpaði að komast upp í efstu deild fyrir mörgum árum síðan. Guðjón hefur átt frábæran feril í efstu deild en er núna kominn heim og ætlar að hjálpa Haukum að komast upp. Verður algjör leiðtogi í þessu liði og stjórnar ferðinni á miðsvæðinu.
Daði Snær Ingason: Einn af uppöldum leikmönnunum og er frábær fótboltamaður. Spilar fremst á miðsvæðinu og kemur með mikið að borðinu; hlaupagetu, baráttu og gæði á boltann.
Frosti Brynjólfsson: Það var frábært fyrir Hauka að fá Frosta aftur frá Fylki í vetur. Var virkilega góður síðast þegar hann lék með Haukum í 2. deild en hann kemur núna aftur með reynslu úr Bestu deildinni. Leikinn kantmaður sem getur farið illa með bakverði deildarinnar.
Komnir:
Andri Steinn Ingvarsson frá Val
Djordje Biberdzic frá Val
Ernest Slupski frá Þrótti R.
Finnbogi Laxdal Aðalgeirsson frá Val
Frosti Brynjólfsson frá Fylki
Guðjón Pétur Lýðsson frá Grindavík
Hallur Húni Þorsteinsson frá Fylki
Marko Panic frá Fjölni
Oliver James Kelaart Torres frá Njarðvík
Óliver Steinar Guðmundsson frá Val
Þorkell Víkingsson í Fylki (á láni)
Farnir:
Adrían Nana Boateng í Val
Arnór Pálmi Kristjánsson í ÍH
Aron Örn Þorvarðarson í Elliða (var á láni frá Fylki)
Auðun Gauti Auðunsson í KF
Gísli Þröstur Kristjánsson í ÍH
Indrit Hoti í Ými (á láni)
Jordan Smylie til Ástralíu
Nikola Dejan Djuric í Hvíta riddarann
Ólafur Karel Eiríksson í Gróttu (var á láni)
Sölvi Sigmarsson í Fjölni (var á láni)
Þjálfarinn segir - Ian Jeffs
„Spáin kemur ekki á óvart. Haukarnir hafa sett mikla vinnu í umgjörðina og liðið og hópurinn hefur æft vel á undirbúningstímabilinu. Ég er ánægður með þjálfarateymið og hópurinn er sterkur. Við munum fara í alla leikina í deildinni til að vinna þá. Svo sjáum við hvert það skilar okkur."
Fyrstu þrír leikir Hauka:
4. maí, Haukar - Höttur/Huginn (BIRTU völlurinn)
10. maí, KFG - Haukar (Samsungvöllurinn)
17. maí, Haukar - Ægir (BIRTU völlurinn)
Athugasemdir
