Gylfi Þór Sigurðsson var í byrjunarliði Everton og lagði upp fyrsta mark leiksins í góðum sigri gegn Brighton.

Gylfi byrjaði á miðjunni í stað Andre Gomes og gaf frábæra fyrirgjöf með vinstri sem Dominic Calvert-Lewin skallaði í netið.

Everton var sterkari aðilinn en Neal Maupay jafnaði fyrir Brighton eftir skelfileg mistök Jordan Pickford sem virkaði afar óöruggur á milli stanganna í dag.

Það sakaði þó ekki því Yerry Mina stangaði aukaspyrnu frá James Rodriguez í netið rétt fyrir leikhlé. James tvöfaldaði svo forystuna í upphafi síðari hálfleiks og innsiglaði kólumbíska stórstjarnan sigur Everton á 70. mínútu.

Brighton reyndi að minnka muninn en Yerry Mina, samlandi James, átti stórleik í hjarta varnarinnar. Yves Bissouma náði þó að minnka muninn með glæsilegu marki í uppbótartíma og urðu lokatölur 4-2.

Everton hefur farið gríðarlega vel af stað á nýju tímabili undir stjórn Carlo Ancelotti og er með fullt hús stiga eftir fjórar umferðir.

Brighton hefur sýnt þokkalega takta gegn erfiðum andstæðingum en er aðeins með þrjú stig.