Borussia Dortmund heimsótti Werder Bremen í lokaleik dagsins í þýska boltanum og voru Marcel Sabitzer og Jadon Sancho báðir í byrjunarliði Dortmund, eftir að hafa leikið með Manchester United á síðustu leiktíð.

Donyell Malen kom Dortmund yfir í fyrri hálfleik og tvöfaldaði Sancho forystuna með sínu fyrsta marki frá endurkomu sinni til félagsins.

Skömmu síðar fékk Sabitzer að líta beint rautt spjald fyrir brot og þurftu gestirnir því að spila seinni hálfleikinn leikmanni færri.

Dortmund gerði vel að nýta færin sín betur í jöfnum fyrri hálfleik og halda svo út þrátt fyrir að vera færri eftir leikhlé.

Lærisveinar Edin Terzic eru í fjórða sæti þýsku deildarinnar, einu stigi fyrir ofan RB Leipzig í baráttunni um síðasta meistaradeildarsætið.