„Rashford virðist vera að vakna sem er stórt því hann er mjög góður í skyndisóknabolta," sagði Aksentije.

„Það er bilaður hraði í honum en það hefur vantað upp á hvernig hann stillir sjálfum sér upp þegar hann er að skjóta," sagði Sæbjörn.

„Ég sagði við einn félaga minn eftir leikinn að í fyrra (á síðasta tímabili) hefði hann ekki verið að skora þessi mörk - markið á móti Liverpool og fyrra markið í þessum leik. Þá var hann að frjósa í stöðunni einn á móti einum. Það virðist eitthvað léttara yfir honum eftir að hann skoraði fyrsta markið. Það er vonandi fyrir United að hann haldi þessu áfram því hann er fullkominn í að stinga sér inn fyrir. Á meðan þú ert með Bruno fyrir aftan þá er þetta risavopn," sagði Aksentije sem valdi Christian Eriksen mann leiksins. Hann lagði upp seinna markið á Rashford.

„Gæðin í þessum gæja eru ótrúleg, mér finnst hann vera skila því sem við bjuggumst við frá okkar góða vin Paul Pogba. Hann er góður sem 'sexa' sem kom mér á óvart. Hann kemur niður, sækir boltann og finnur þessar sendingar á milli miðju og varnar," sagði Aksentije.

Rashford skoraði einungis fjögur mörk í úrvalsdeildinni á síðasta tímabili í 25 leikjum. Hann er 24 ára Englendingur sem uppalinn er hjá United.

Eriksen er þrítugur danskur miðjumaður sem kom á frjálsri sölu frá Brentford í sumar.