Kate Abdo stjórnar útsendingu CBS og er með þá Carragher, Richards og Thierry Henry með sér í settinu.

Þremenningarnir skemmta sér yfirleitt konunglega í útsendingum og skjóta föstum skotum fram og til baka, en Carragher gekk yfir strikið í útsendingunni í gær.

Carragher var klæddur í treyju Arsenal eftir sigur liðsins á Porto í vítakeppni, en hann sagði eftir leikinn að Abdo þyrfti næst að klæðast treyju, en að hún neitaði beiðni hans. Abdo styður Manchester United og sagðist þá sýna því hollustu sína.

„Hverjum ertu trygg?“ spurði Carragher áður en Abdo svaraði: „Manchester United.“ .

Carragher skaut því þá að henni að hún væri ótrú unnustanum, Malik Scott. Dauðaþögn sló á hópinn, þar sem Richards, sem er yfirleitt hrókur alls fagnaðar, starði í grasið áður en Abdo spurði Carragher: „Af hverju myndirðu segja þetta?“ .

Fyrrum varnarmaðurinn virtist hálf vandræðalegur eftir að hafa sleppt orðinu og varð augnablikið óþægilegt í alla staði. Stuttu síðar kom auglýsingahlé en atvikið má sjá hér fyrir neðan.