Gylfi æfði með Fylki á Spáni á dögunum, en Fylkismenn voru þá í æfingaferð. Ragnar Bragi Sveinsson, leikmaður Fylkis, segir í hlaðvarpinu Gula Spjaldið að Gylfi hafi litið gríðarlega vel út á æfingunum.

„Standið á honum er bara mjög gott. Hann leit fáránlega vel út en hann tók þrjár eða fjórar æfingar með okkur," sagði Ragnar Bragi í hlaðvarpinu. „Þó það sé skrítið að segja það, þá kom það mér á óvart hversu ógeðslega góður hann er í fótbolta. Við fórum í skotæfingu og ég hef aldrei séð svona."

Gylfi hefur verið að glíma við meiðsli og hefur ekki spilað síðan í nóvember. Ragnar Bragi segir að Gylfi sé í hörkustandi en vanti að komast í leikform.

„Hann er miklu léttari en ég hélt. Hann er í góðu formi og tók þátt í öllu nema á fyrstu æfingunni. Valur er að fá geðveikan leikmann. Maður dauðöfundar strákana í Val að fá að æfa með svona gaur; leikmaður á svona kalíberi lyftir öllu. Að fá svona gaur inn er ótrúlega gaman."