Víkingur R. og FH áttust við í Lengjubikar kvenna í kvöld og úr varð spennandi slagur, þar sem gestirnir úr Hafnarfirði leiddu með tveggja marka forystu í leikhlé.

Berglind Freyja Hlynsdóttir og Hildigunnur Ýr Benediktsdóttir skoruðu mörk FH-inga í fyrri hálfleik en Bergdís Sveinsdóttir minnkaði muninn snemma í síðari hálfleik.

Það leið þó ekki á löngu þar til FH tvöfaldaði forystuna á ný, en í þetta sinn var Selma Sól Sigurjónsdóttir á ferðinni.

Nadía Atladóttir minnkaði muninn aftur niður í eitt mark fyrir Víking R. og var lokakafli leiksins spennandi, allt þar til á 88. mínútu þegar Selma skoraði sitt annað mark til að innsigla sigur FH.

FH lýkur keppni með níu stig úr fimm umferðum á meðan Víkingur endar með sex stig.