Retegui og Bremer í baráttunni.

Mynd: EPA

Íslenski landsliðsmaðurinn Albert Guðmundsson var í byrjunarliði gestanna og spilaði hann 70. mínútur í dag. Ruslan Malinovsky kom inn á fyrir Albert þegar tuttugu mínútur voru til leiksloka.

Leikurinn sjálfur var mjög bragðdaufur en gestirnir áttu besta færi fyrri hálfleiksins en það kom eftir fyrirgjöf frá Alberti en inn vildi boltinn ekki.

Genoa varðist vel í síðari hálfleiknum og gekk Juventus afskaplega illa að skapa sér góð færi. Dusan Vlahovic fékk þó mjög gott skallafæri en hann náði ekki að hitta á markið.

Í uppbótartímanum komst Moise Kean í hörkufæri til að tryggja Juve sigurinn en hann þrumaði knettinum í stöngina. Undir lok leiks missti Vlahovic stjórn á skapi sínu og fékk tvö gul spjöld með stuttu millibili og þar með rautt.

Bragðdauft jafntefli niðurstaðan og því mjög góð úrslit fyrir nýliðana í Genoa. Liðið er í tólfta sæti deildarinnar með 34 stig en Juventus er í því þriðja með 59 eins og AC Milan.