FC Seoul vann 2-0 sigur á Jeju United í Suður-Kóreska boltanum í gær en enski leikmaðurinn Jesse Lingard er á mála hjá Seoul.
Ferill Lingard hefur farið hratt niðurávið en hann kom inn á sem varamaður eftir tæpa klukkustund í gær í sigurleiknum gegn Jeju.
Kim Gi-dong, þjálfari Seoul, var hins vegar ekki ánægður með Lingard og gagnrýndi hann leikmanninn í viðtali eftir leikinn.
„Þrátt fyrir að hann hafi komið inn á sem varamaður, þá lagði hann sig ekki fram," sagði Kim.
„Hann forðaðist návígi, nöfn á leikmönnum skiptir engu þegar komið er út á völlinn. Ég mun láta hann vita af þessu."
Lingard hefur oft verið gagnrýndur fyrir að vera með hugann við eitthvað allt annað en fótbolta en hann á að baki 32 landsleiki fyrir England á sínum ferli.
Athugasemdir
