Kári í leiknum gegn Nígeríu.
„Við töpuðum leiknum svo, auðvitað er hægt að gera eitthvað betur. Auðvitað erum við með plan B, við erum með ákveðnar færslur sem við tökum þegar við þurfum að sækja mark. Það sem gerist er að skipulagið riðlast full mikið, afhverju veit ég ekki en það gerir það," sagði Kári Árnason varnarmaður íslenska landsliðsins sem var spurður að því á fréttamannafundi í morgun hvort landsliðið hafi verið með plan B eftir að þeir lentu undir í leiknum gegn Nígeríu á föstudaginn.
„Við vorum alveg með þetta lið, þeir eiga ekki skot á markið í fyrri hálfleik við skulum ekki gleyma því. Fólk talar svolítið eins og við eigum að vinna Nígeríu. Það er enginn í liðinu sem hugsar þannig, ekki einn maður. Við hugsum; við getum unnið Nígeríu og við ætluðum okkur að vinna Nígeríu en þetta er engu að síður stórþjóð í fótbolta og við erum underdog í þessum leik. Við höldum ekki að við séum það góðir að við getum mætt í leikinn og rústað Nígeríu og síðan bara tökum við Króatíu í næsta leik. Það er ekki þannig."
Kári segir að leikskipulagið í fyrri hálfleik hafi verið frábært og ef Ísland hefði komist yfir í fyrri hálfleik þá hefði leikurinn þróast töluvert öðruvísi.
„Það sem gerist svo er að þeir ná skyndisókn eftir okkar eigið fast leikatriði sem má ekki gerast. Eftir það setur það okkur kannski úr jafnvægi eða ekki en þá riðlast leikurinn og það átti ekki að gerast."
„Við erum alltaf með plan B en það gekk bara ekki nægilega vel upp. Við höfum kannski fá svör þegar þeir byrja að reyna draga okkur framar og beita fleiri skyndisóknum og kannski héldum við ekki nægilega vel í þá. Afhverju það var, veit ég ekki alveg," sagði Kári.
Athugasemdir
