Mikel Arteta hefur fengið mikla gagnrýni að undanförnu vegna arfaslaks gengis Arsenal á upphafi tímabils.

Hann ákvað að bregðast við þessari gagnrýni með að gefa ungum og hungruðum leikmönnum félagsins tækifæri í aðalliðinu. Hann valdi engan smá leik til að gera það, nágrannaslaginn gegn Chelsea.

Þar fengu menn á borð við Emile Smith-Rowe (20), Bukayo Saka (19) og Gabriel Martinelli (19) tækifæri í fremstu víglínu á meðan Pierre-Emerick Aubameyang og Nicolas Pepe voru geymdir á bekknum.

Fyrri hálfleikurinn var nokkuð jafn þar sem heimamenn virtust eilítið beittari og skoraði Alexandre Lacazette fyrsta mark leiksins með marki úr vítaspyrnu. Tíu mínútum síðar tvöfaldaði Granit Xhaka forystuna með glæsilegu marki beint úr aukaspyrnu.

Heimamenn urðu betri í síðari hálfleik og verðskuldaði Bukayo Saka að skora þriðja mark Arsenal á 56. mínútu. Arsenal komst nálægt því að bæta fjórða markinu við áður en Tammy Abraham minnkaði muninn fyrir gestina.

Það færðist spenna í leikinn í uppbótartíma þegar Jorginho steig á vítapunktinn en Bernd Leno gerði vel að verja frá honum og lokatölur urðu 3-1.

Arsenal er því með 17 stig eftir 15 umferðir en þetta er skellur fyrir Chelsea sem hefði getað jafnað Leicester á stigum í öðru sæti með sigri.

Þetta var fyrsti sigur Arsenal í ensku úrvalsdeildinni síðan liðið lagði Manchester United að velli á Old Trafford. Síðan þá höfðu lærisveinar Arteta aðeins nælt sér í tvö stig úr sjö leikjum.