Sílemaðurinn Arturo Vidal segir að Lionel Messi sé frá annarri plánetu en þeir áttu báðir frábæran leik í 5-1 sigrinum á Valladolid í gær.
Vidal fékk langþráð tækifæri í byrjunarliði Barcelona og nýtti það með því að skora laglegt mark eftir glæsilega sendingu frá Messi.
Messi skoraði sjálfur tvö mörk og lagði upp tvö mörk.
„Það hjálpar svo sannarlega til þegar Leo gefur allt sitt í leikina og þegar hann spilar svona þá finnur liðið það," sagði Vidal.
„Við sjáum hann á hverjum degi en hann kemur okkur alltaf jafn mikið á óvart. Leo er frá annarri plánetu. Ég á erfitt með að lýsa Leo í orðum," sagði hann í lokin.
Athugasemdir