Með þessu er ætlun KSÍ að koma í veg fyrir að utanaðkomandi aðilar geti hagnast á auðkenni landsliða Íslands.

Hugleikur Dagsson hefur selt boli með víkingaklappinu og merkingunni "Hú" en á dögunum fékk hann tilkynningu um að búið væri að kaupa einkaleyfi á orðinu og því mætti hann ekki selja slíka boli áfram.

Gunnar Þór Andrésson, íþróttafræðingur á einakaleyfið á Húh! en hann sótti um leyfið þegar EM stóð yfir í Frakklandi 2016. Gunnar birti yfirlýsingu á vef RÚV í dag þar sem hann segist sjá eftir því að hafa náð í einkaleyfið.

„Ég hef orðið fyrir miklu áreiti út af þessu máli og fengið mörg andstyggileg skilaboð. Þá hefur nafni mínu verið úthúðað í athugasemdakerfi landsins og einnig út fyrir landsteinana. Mér hefur verið hótað, ég er kallaður öllum illum nöfnum og einhverjir hafa séð ástæðu til þess að pósta heimilisfangi mínu og símanúmeri. Ég skal alveg viðurkenna að ég hef tekið þetta nærri mér enda óvanur því að nafn mitt sé í opinberri umræðu. Enn fremur er mér ljóst að það sem fer á veraldarvefinn hverfur ekki," segir Gunnar nú meðal annars í yfirlýsingunni.

KSÍ hefur nú óskað eftir að vörumerkaskráning á Húh! verði felld úr gildi.

„Beiðni KSÍ er tvíþætt, í fyrsta lagi að fyrrnefnd skráning verði felld úr gildi þar sem merkið hafi ekki að bera nægileg sérkenni til að auðkenna vörur eða þjónustu eins aðila frá öðrum sem er skilyrði þess að hægt sé að skrá vörumerki," segir á heimasíðu KSÍ.

„Telji skráningaryfirvöld hins vegar að orðið húh sé skráningarhæft, þá fer KSÍ til vara fram á að sambandið eigi meiri rétt á þeirri skráningu á grundvelli notkunar."

„Knattspyrnusambandið er á engan hátt aðili að deilum aðila í tengslum við viðkomandi vörumerkjaskráningu."