Nottingham Forest er búið að missa af belgíska landsliðsmanninum Michy Batshuayi vegna þess að mikilvæg gögn fyrir félagsskiptin komust ekki til skila fyrir lok félagsskiptagluggans.
Glugginn er lokaður en það á enn eftir að staðfesta þónokkur félagsskipti þar sem menn munu vera að fram á nótt. Skjöl sem bárust knattspyrnuyfirvöldum fyrir gluggalok eru gild og verður unnið úr þeim á næstu klukkustundum.
Batshuayi verður því áfram hjá Chelsea nema að einhver önnur lausn finnist utan félagsskiptagluggans. Batshuayi er aftastur í goggunarröðinni hjá Thomas Tuchel, eftir Pierre-Emerick Aubameyang, Kai Havertz og Armando Broja í baráttunni um byrjunarliðssæti í fremstu víglínu.
Forest er svekkt með þessar fregnir en stjórnendur munu ekki fara að gráta eftir að hafa fengið um það bil 20 leikmenn til liðs við félagið í sumar.
