Miðjumaðurinn Sæunn Björnsdóttir skrifaði undir samning, en hún var valin knattspyrnukona Hauka árið 2018. Hún er aðeins 18 ára gömul, en á þrátt fyrir það að baki 78 leiki í deild og bikar og hefur skorað 9 mörk.

Heiða Rakel Guðmundsdóttir framlengdi samning sinn við félagið. Heiða Rakel er kraftmikill sóknartengiliður sem býr yfir miklum hraða. Heiða er uppalin á Ásvöllum og hefur verið ein af lykilmönnum liðsins undanfarin tímabil.

Þá gengur Ásta Sól Stefánsdóttir í raðir Hauka frá Selfossi.

„Ásta er fjölhæfur leikmaður sem býr yfir miklum krafti og dugnaði. Hún getur leyst margar stöður á vellinum þó svo að hún leiki yfirleitt stöðu sóknartengiliðs en hún er útsjónarsöm og fylgin sér. Ásta mun efla hópinn okkar fyrir komandi baráttu," segir í tilkynningu frá Hafnarfjarðarfélaginu.

Áður höfðu þær Hildur Karítas Gunnarsdóttir, Dagrún Birta Karlsdóttir, Helga Ýr Kjartansdóttir, Kristín Fjóla Sigþórsdóttir framlengt samninga sína við félagið.

Haukar höfnuðu í fjórða sæti Inkasso-deildarinnar á síðasta ári.