Þór er með fullt hús stiga á toppi Lengjudeildar karla eftir þægilegan sigur á Þrótti í Laugardalnum.

Þórsarar, sem léku í bleikum varabúningum í kvöld, komust yfir eftir 13 mínútur. Var þar að verki spænski markahrókurinn Alvaro Montejo.

Fyrir leikhlé var staðan orðin 2-0 því Jóhann Helgi Hannesson, sem er að koma sterkur til baka eftir höfuðhögg, skoraði á 39. mínútu. „Bjarki Þór á langt innkast beint á Alvaro sem reynir hjólhestaspyrnu sem fer í Þróttara og Jóhann Helgi kemur sér á undan Franko í boltann og setur hann í autt mark," skrifaði Anton Freyr Jónsson í beinni textalýsingu.

Seinni hálfleikurinn var rólegur. Þórsarar voru skipulagðir og lönduðu góðum útisigri.

Þetta var fyrsti leikurinn í þriðju umferð. Þór hefur unnið alla sína leiki til þessa á meðan Þróttur hefur tapað öllum sínum leikjum.